SECOND WEEK🧑‍🏫

 ഇരുപത്തിയൊന്നാം തീയതി തിങ്കളാഴ്ച മുതൽ 26 തീയതി ശനിയാഴ്ച വരെ ആയിരുന്നു അധ്യാപക പരിശീലനത്തിന്റെ രണ്ടാമത്തെ ആഴ്ച. ഇതിൽ രണ്ടുദിവസം അവധിയായിരുന്നു ആയതിനാൽ ആണ് ശനിയാഴ്ച പ്രവർത്തി ദിനം ആക്കിയത്. ആദ്യ ആഴ്ചയിൽ അനുഭവപ്പെട്ട പ്രശ്നങ്ങളൊക്കെ തന്നെ മാറിയതായി അനുഭവപ്പെട്ടു. കുട്ടികളൊക്കെ തന്നെയും വളരെ സഹകരണത്തോടെ തന്നെയാണ് ഞങ്ങളോട് ഇടപഴകുന്നത്.

              ആദ്യ ആഴ്ചയിൽ തുടങ്ങിയ പാഠത്തിന്റെ   ബാക്കി ഭാഗം തന്നെയാണ് ഈ ആഴ്ചയും പഠിപ്പിച്ചത്. ഐസിടിയും ചാർട്ട്മൊക്കെ ഉപയോഗിച്ചുള്ള പഠനം കുട്ടികളെ വളരെയധികം സന്തോഷിപ്പിക്കുന്നുണ്ട്. കുട്ടികൾക്ക് ഭക്ഷണം വിളമ്പാനുള്ള ഡ്യൂട്ടിയും അതോടൊപ്പം തന്നെ പഠനത്തിൽ പിന്നോക്കം നിൽക്കുന്ന കുട്ടികളെ അടിസ്ഥാന കാര്യങ്ങൾ പഠിപ്പിക്കുന്നതിനുള്ള ഡ്യൂട്ടിയും പ്രധാന അധ്യാപിക ഞങ്ങൾക്ക് നൽകി. വളരെ സന്തോഷത്തോടെ ഞങ്ങൾ ഇതൊക്കെ ചെയ്യുന്നുണ്ട്.

            കഴിഞ്ഞ ആഴ്ചത്തെ പോലെ തന്നെ ഈ ആഴ്ചയിലും പാഠ്യേതര പ്രവർത്തനങ്ങൾക്കും പ്രാധാന്യം കൊടുക്കുന്നതായി കാണപ്പെട്ടു. ഈയാഴ്ചയും സൂമ്പാ പരിശീലനവും കരാട്ടെ പരിശീലനവും മറ്റു കായിക പരിശീലനങ്ങളും സ്കൂളിൽ ഉണ്ടായിരുന്നു.. കൂടുതൽ അറിവും അനുഭവങ്ങളും നേടാൻ സാധിച്ച നല്ലൊരു ആഴ്ച തന്നെയായിരുന്നു ഇതും.

 രണ്ടാമത്തെ ആഴ്ചയിലെ വാരാന്ത്യ പ്രതിഫലനം ഓൺലൈൻ ആയാണ്സംഘടിപ്പിക്കപ്പെട്ടത്. ശനിയാഴ്ച പ്രവർത്തി ദിവസമായിരുന്നതിനാലാണ് ഓൺലൈൻ റിഫ്ലക്ഷൻ സംഘടിപ്പിച്ചത്. ഞങ്ങളുടെ  മലയാള അധ്യാപകൻ അഖിൽ സാറിന്റെ നേതൃത്വത്തിലാണ് റിഫ്ലക്ഷൻ നടന്നത്. ഒരാൾ ഒഴികെ ബാക്കി എല്ലാവരും പങ്കെടുത്തിരുന്നു

ചാന്ദ്രയാൻ ദിന ആഘോഷം @MTHS AARUMURIKKADA

 ജൂലൈ 21 ചാന്ദ്രയാൻ ദിനത്തോടനുബന്ധിച്ച് ഞങ്ങളുടെ സ്കൂളിലും പ്രത്യേകം പരിപാടികൾ സംഘടിപ്പിച്ചു. കുട്ടികളെ എല്ലാം പങ്കെടുപ്പിച്ചുകൊണ്ടുള്ള ഒരു സ്പെഷ്യൽ അസംബ്ലി ആണ് സ്കൂളിൽ നടത്തപ്പെട്ടത്. അസംബ്ലിയെ കൂടാതെ ചാന്ദ്രയാൻ ദിന  ക്വിസ് മത്സരവും പോസ്റ്റർ നിർമ്മാണവും സംഘടിപ്പിക്കപ്പെട്ടു. ഇവയിൽ ആദ്യ സ്ഥാനങ്ങൾ മേടിച്ച കുട്ടികൾക്ക് അസംബ്ലിയിൽ വെച്ച് സമ്മാനങ്ങൾ വിതരണം ചെയ്തു. സ്കൂളിലെ എല്ലാ കുട്ടികളും ഈ അസംബ്ലിയിൽ പങ്കെടുത്തു.. എല്ലാ അധ്യാപകരും അനധ്യാപകരും അതോടൊപ്പം തന്നെ ഞങ്ങൾ അധ്യാപക വിദ്യാർത്ഥികളും ഗ്രൗണ്ടിൽ അണിനിരന്നു. പ്രിൻസിപ്പലാണ് അസംബ്ലിയിൽ മുഖ്യ പ്രഭാഷണം നടത്തിയത്. അതിനുശേഷം കുട്ടികളുടെ വകയായി നിരവധി പരിപാടികൾ ഉണ്ടായിരുന്നു. പാട്ടും ഡാൻസും ചെറിയ പ്രസംഗങ്ങളും ഒക്കെയായി വളരെ ഫലപ്രദമായതും മനോഹരവുമായ ഒരു അസംബ്ലി ആയിരുന്നു അത്. ആകാശ സഞ്ചാരികളെ പോലെ വേഷം ധരിച്ച കുട്ടികൾ അതിന്റെ മുഖ്യ ആകർഷക മായി മാറി.

FIRST WEEK @MTHS AARUMURIKKADA

ബി എഡ് കരിക്കുലത്തിന്റെ ഭാഗമായുള്ള അധ്യാപന പരിശീലനത്തിന്റെ ആദ്യ ആഴ്ച പിന്നിട്ടിരിക്കുകയാണ്. വളരെ അധികം സന്തോഷം നിറഞ്ഞ 5 ദിവസങ്ങളാണ് കടന്ന് പോയിട്ടുള്ളത്. ആദ്യ ദിവസം തന്നെ ക്ലാസ്സ്‌ എടുക്കാൻ അവസരം ലഭിച്ചിരുന്നു. കുട്ടികൾ വളരെ നല്ല രീതിയിൽ തന്നെയാണ് ഇടപഴകുന്നത്. ടീച്ചർ മാരും പ്രിൻസിപ്പാളും നമ്മുക്ക് വേണ്ടുന്ന നിർദ്ദേശങ്ങൾ എല്ലാം തന്നെ തരാറുണ്ട്.

   

                    ഒമ്പതാം ക്ലാസ്സാണ് എനിക്ക് ക്ലാസ് എടുക്കാനായി അനുവദിച്ചിരിക്കുന്നത്. ആകെ 12 കുട്ടികളാണ് ആ ക്ലാസ്സിൽ ഉള്ളത്. മലയാളം മീഡിയം ആണത്. സ്കൂളിൽ പുതുതായി വന്ന സുജ ടീച്ചർ ആണ് ആ ക്ലാസ്സിൽ മലയാളം പഠിപ്പിക്കുന്നത് ആയതുകൊണ്ട് തന്നെ എന്റെ മെന്റർ ടീച്ചറും സുജ ടീച്ചർ ആണ്. എന്റെ എല്ലാ ക്ലാസുകളിലും ടീച്ചർ വന്നിരിക്കാറുണ്ട്. അതിലുപരിയായി വേണ്ടുന്ന  എല്ലാ സഹായങ്ങളും ചെയ്തു തരാറുണ്ട്.

               പാഠ്യപ്രവർത്തനങ്ങളോടൊപ്പം തന്നെ പാഠ്യേതര പ്രവർത്തനങ്ങൾക്കും സ്കൂളിൽ തുല്യമായ പ്രാധാന്യം കൊടുക്കുന്നത് കാണാൻ സാധിച്ചിട്ടുണ്ട് . സൂമ്പാ ഡാൻസും കരാട്ടെ പരിശീലനവും മറ്റു കായിക പരിശീലനങ്ങളും കുട്ടികൾക്ക് ഉച്ചയ്ക്ക് ശേഷം നൽകാറുണ്ട്. വളരെ നല്ല ഒരു സ്കൂൾ അന്തരീക്ഷമാണ് ഞങ്ങൾക്ക് എല്ലാവർക്കും അനുഭവപ്പെട്ടിട്ടുള്ളത്.

                         

 അധ്യാപന പരിശീലനത്തിന്റെ ഒന്നാമത്തെ ആഴ്ചയ്ക്ക് ശേഷമുള്ള വാരാന്ത്യ പ്രതിഫലനം ശനിയാഴ്ച കോളേജിൽ ജനറൽ ഹാളിൽ വച്ച് നടത്തപ്പെട്ടു. എല്ലാ കുട്ടികളും അതിൽ പങ്കെടുത്തിരുന്നു. ആദ്യ ആഴ്ചയിൽ ഉണ്ടായ പ്രയാസങ്ങളും അതേപോലെതന്നെ മറക്കാനാകാത്ത  അനുഭവങ്ങളും എല്ലാ അധ്യാപക വിദ്യാർത്ഥികളും പങ്കുവെച്ചു 

Weekend reflection.

 

സൂമ്പ പരിശീലനം

TEACHING PRACTICE

 TEACHING PRACTICE DAY 1..........

          ഒരു അധ്യാപിക ആയി കുട്ടികൾക്ക് മുന്നിലുള്ള എന്റെ ആദ്യ ദിവസം 🧑‍🏫♥️✨

             ജീവിതത്തിലെ മറക്കാൻ കഴിയാത്ത ഒരു ദിവസമായിരുന്നു ഇന്ന്...

 അധ്യാപക പരിശീലനത്തിന്റെ ആദ്യ ദിനം ഇന്നായിരുന്നു. അല്പം പരിഭ്രമത്തോടെയാണ് സ്കൂളിലേക്ക് കടന്നു ചെന്നതെങ്കിലും മറ്റ് അധ്യാപകരെയും കുട്ടികളെയും ഒക്കെ കണ്ടപ്പോൾ അത് മാറി. 70 ദിവസത്തെ അധ്യാപക പരിശീലനത്തിന്റെ ആദ്യഘട്ടമാണ് ഇന്ന് തുടങ്ങിയത്. 40 ദിവസമാണ് ആദ്യത്തെ ഘട്ടത്തിൽ ഉള്ളത്. ബാക്കിയുള്ള 30 ദിവസം അധ്യാപക പരിശീലനത്തിന്റെ രണ്ടാമത്തെ ഘട്ടമാണ്. കുണ്ടറ ആറുമുറികടയിൽ ഉള്ള  മാർത്തോമാ സ്കൂളാണ് അധ്യാപക പരിശീലനത്തിനായി ഞാൻ തിരഞ്ഞെടുത്തത്. എന്നോടൊപ്പം എന്റെ കോളേജിൽ നിന്നും 9 കുട്ടികൾ കൂടിയുണ്ട്. അതിൽ രണ്ടു പേർ മലയാളം വിദ്യാർഥിനികളാണ്.

                     രാവിലെ ഒമ്പതരയോടെ സ്കൂളിൽ എത്തിച്ചേരുകയും പ്രാർത്ഥനയ്ക്ക് ശേഷം ഞങ്ങൾക്കായി അനുവദിച്ചിരിക്കുന്ന ഒരു മുറിയിലേക്ക് പോവുകയും ചെയ്തു. പ്രധാന അധ്യാപികയുടെ വകയായി കുറെയധികം നിർദ്ദേശങ്ങളും ഞങ്ങൾക്ക് നൽകിയിരുന്നു. ഉച്ചയ്ക്ക് ശേഷമുള്ള ആറാമത്തെ പീരിയഡ് ആയിരുന്നു ഇന്ന് എനിക്ക് ക്ലാസ് ഉണ്ടായിരുന്നത്. അതുവരെയുള്ള സമയം പാടാസൂത്രണം എഴുതുന്നതിനും മറ്റുമായി ചിലവഴിച്ചു. ഉച്ചയ്ക്ക് എല്ലാവരോടും ഒപ്പം ഇരുന്ന് ഭക്ഷണവും കഴിച്ച് ഒന്നരയോടെ ക്ലാസിലേക്ക് പോയി.

         9 എ ക്ലാസ് ആയിരുന്നു എനിക്ക് ലഭിച്ചത്. ഒന്നാമത്തെ പാഠത്തിലെ മൂന്നാമത്തെ അധ്യായമാണ് ഇന്ന് ഞാൻ അവർക്ക് തുടങ്ങിവച്ചത്. ആകെ 12 കുട്ടികളാണ് അവിടെയുള്ളത്. അതിൽ 9 പേർ മാത്രമാണ് ഇന്ന് ഉണ്ടായിരുന്നത്. മലയാളം മീഡിയം ക്ലാസ് ആണിത്. ആദ്യത്തെ പരിഭ്രമം കുറച്ചുനേരം കഴിഞ്ഞ് മാറുകയും കുട്ടികളോട് സഹകരിച്ച് ക്ലാസ് പൂർത്തിയാക്കുവാൻ  സാധിക്കുകയും ചെയ്തു. കുട്ടികളെ അടക്കി ഇരുത്താൻ ഇത്തിരി ബുദ്ധിമുട്ടിയത് കാരണം പാടാസൂത്രണം മുഴുവനും ഇന്ന് എനിക്ക് തീർക്കാൻ കഴിഞ്ഞില്ല. എങ്കിലും വളരെ നല്ലൊരു അനുഭവമായിരുന്നു ഇന്നത്തെ ദിവസം എനിക്ക് നൽകിയത്. അധ്യാപക ജീവിതത്തിലെ ഒരിക്കലും മറക്കാനാവാത്ത ഒരു ദിവസം കൂടിയായിരുന്നു ഇന്ന്.